“Ma’rifat ulashib” loyihasi doirasidagi adabiy uchrashuv Navoiy innovatsiyalar universitetida o‘tkazildi
Navoiy Innovatsiyalar universitetida Oliy ta’lim, fan va innovatsiyalar vazirligi hamda O‘zbekiston Yozuvchilar uyushmasi hamkorligida an’anaviy tarzda o‘tkazilib kelinayotgan “Ma’rifat ulashib” loyihasi doirasida yana bir yirik adabiy uchrashuv tashkil etildi. Tadbirga O‘zbekiston Yozuvchilar uyushmasi a’zolari, taniqli adiblar To‘lqin Hayit, Oydinniso va Safar Olloyor tashrif buyurishdi.
Adabiy uchrashuv davomida mehmonlar avvalo Karmana tumani 5-umumiy o‘rta ta’lim maktabiga yo‘l olishdi. Bu yerda o‘quvchilar bilan jonli muloqot o‘tkazilib, ularning kitobga bo‘lgan qiziqishlarini oshirishga qaratilgan suhbatlar bo‘lib o‘tdi. Adiblar o‘z asarlaridan namunalar keltirib, yosh avlodni ijodga, ma’naviyat va ma’rifatga oshno qilish borasida o‘zlarining boy hayotiy tajribalarini ulashishdi.
Shundan so‘ng, mehmonlar Navoiy Innovatsiyalar universitetining bosh binosi va B binosiga tashrif buyurishdi. Bu yerda talabalar va universitet xodimlari bilan adabiy muloqot tashkil qilindi. Uchrashuv davomida adiblar yoshlarga o‘z ijodiy yo‘llaridan hikoya qilib berishdi. Ular kitob mutolaasi, adabiyotning hayotdagi o‘rni, ijodning yoshlar ma’naviy kamolotidagi ahamiyati haqida fikr yuritishdi.
Uchrashuv so‘ngida adiblar yoshlarga o‘zlarining ezgu tilaklarini bildirdilar va ularga kitobni do‘st, ilmni esa umr yo‘ldosh sifatida tanlashni tavsiya qilishdi. Bu kabi adabiy tadbirlar yoshlarga faqat ma’rifat ulashibgina qolmay, balki ularni yuksak orzular sari ruhlantirishi shubhasizdir.
